Yanvarın 22-də İqtisadi İnkişaf Nazirliyinin İqtisadi İslahatlar Elmi-Tədqiqat İnstitutunda “Türkiyənin inkişaf təcrübəsindən” mövzusunda seminar keçirilmişdir. Tədbirdə İnstitutun əməkdaşları və doktorantları ilə yanaşı, İqtisadi İnkişaf Nazirliyinin struktur bölmələrinin və tabeliyindəki qurumlarının nümayəndələri iştirak etmişlər.

Seminarı giriş sözü ilə açan İqtisadi İslahatlar Elmi-Tədqiqat İnstitutunun direktoru Vilayət Vəliyev Azərbaycanda uğurla həyata keçirilən sosial-iqtisadi siyasət nəticəsində ölkəmizin qazandığı iqtisadi uğurlar barədə məlumat vermiş, iqtisadi sahədə qarşıya qoyulmuş strateji hədəflərin reallaşdırılmasında beynəlxalq, o cümlədən Türkiyə təcrübəsinin öyrənilməsinin əhəmiyyətini vurğulamışdır. Vilayət Vəliyev həmçinin, İnstitutda aparılan, xüsusilə də Türkiyənin təcrübəsindən istifadə olunmaqla həyata keçirilən tədqiqatları tədbir iştirakçılarının diqqətinə çatdırmış, bu gün keçirilən seminarın əhəmiyyətini vurğulamışdır. Belə seminarların iqtisadi tədqiqatların aparılmasında, xarici təcrübənin öyrənilməsində, qarşılıqlı fikir mübadiləsinin həyata keçirilməsində əhəmiyyətini nəzərə alınaraq gələcəkdə də mütamadi olaraq keçiriləcəyi bildirilmişdir.

Türkiyənin Fatih Universitetinin müəllimləri Mustafa Öztükr “ÜTT-nin Türkiyənin inkişafındakı rolu”, Yavuz Ağan “Sənaye istehsalının Türkiyənin inkişafındakı rolu”, Turqut Özal Universitetinin müəllimi Yavuz Kahraman isə “KOS-ların Türkiyənin inkişafındakı rolu və dövlət dəstəyi” mövzusunda məruzələrlə çıxış etmişlər.

Sonda mövzu ətrafında müzakirələr aparılmış, iştirakçıları maraqlandıran suallar cavablandırılmışdır.

© İstifadə zamanı www.ier.az saytına istinad zəruridir.