Sentyabrın 5-də İqtisadi Əməkdaşlıq Təşkilatına (İƏT) üzv ölkələrin İqtisadi Beyin Mərkəzlərinin I Bakı Forumu öz işinə başlayacaq. Tədbirdə iştirak etmək məqsədilə İƏT-ə üzv ölkələrin İqtisadi Beyin Mərkəzlərinin rəhbərləri, dünyanın müxtəlif ölkələrindən olan elm adamları Bakıda səfərdədir.

Forum çərçivəsində bu gün İƏT-ə üzv ölkələrin İqtisadi Beyin Mərkəzlərinin nümayəndələrinin işçi görüşü keçirilmişdir. Görüşdə elmi tədqiqatlar üzrə əməkdaşlıq istiqamətlərinə, İƏT-ə üzv ölkələr arasında regional inteqrasiyanın dəstəklənməsinə, beyin mərkəzlərinin daimi əlaqələndirmə şurasının yaradılmasına və s. məsələlərə dair fikir mübadiləsi aparılmışdır. Tədbir çərçivəsində həmçinin, İqtisadi İnkişaf Nazirliyinin İqtisadi İslahatlar Elmi-Tədqiqat İnstitutu ilə Pakistan və Qırğızıstanın analoji qurumları arasında, o cümlədən Azərbaycan, Qırğızıstan, Qazaxıstan və "EcoMod Networking" şirkəti arasında əməkdaşlığa dair memorandumlar imzalanmışdır.

Sabah isə Bakı Biznes Mərkəzində İqtisadi Əməkdaşlıq Təşkilatına üzv ölkələrin İqtisadi Beyin Mərkəzlərinin I Bakı Forumu çərçivəsində "Enerji, Regional İnteqrasiya və Sosial-İqtisadi İnkişaf" mövzusunda 1-ci Beynəlxalq Konfrans keçiriləcək.

© İstifadə zamani www.ier.az saytına istinad zəruridir.